У Беларусі ўпершыню падрыхтаваны вучэбна-метадычны камплект "Асновы фінансавай граматнасці" для вучняў 8–9-х класаў

Нацыянальны банк, Міністэрства адукацыі і аўтарскі калектыў Беларускага дзяржаўнага ўніверсітэта ўпершыню ў Беларусі падрыхтавалі вучэбна-метадычны камплект "Асновы фінансавай граматнасці" для факультатыўных заняткаў вучняў 8–9-х класаў, які складаецца з дапаможніка для вучняў і дапаможніка для настаўнікаў (далей – ВМК).

ВМК ухвалены Навукова-метадычнай установай "Нацыянальны інстытут адукацыі" Міністэрства адукацыі Рэспублікі Беларусь і рэкамендаваны для выкарыстання ў навучальным працэсе.

ВМК змяшчае тэарэтычны матэрыял і практычныя заданні, прызначаныя для фарміравання ведаў па фінансавай граматнасці. Дапаможнік для вучняў раскрывае асноўныя тэмы ў сферы фінансаў: сямейны (асабісты) бюджэт, зберажэнне і страхаванне, крэдыт і іншыя формы фінансавання, прафесіі ў фінансавай сферы, грошы і грашовае абарачэнне, лічбавы банкінг, інвестыцыі, падаткі. Дапаможнік для настаўнікаў з'яўляецца арыенцірам для педагога ў працэсе правядзення факультатыўных заняткаў па фінансавай граматнасці.

Па заказе Нацыянальнага банка надрукавана 6 тыс. экзэмпляраў ВМК, якія будуць перададзены ў бібліятэкі ўстаноў агульнай сярэдняй адукацыі.

Акрамя таго, электронная версія ВМК у свабодным доступе размешчана на Адзіным партале фінансавай граматнасці (дапаможнік для вучняў і дапаможнік для настаўнікаў), а таксама на Нацыянальным адукацыйным партале (дапаможнік для вучняў і дапаможнік для настаўнікаў).